الثلاثاء، سبتمبر 14، 2010


مصر مش اللي بتسلم 
على ايدين اللى باعوا
و لا اللى بتوطى فصوت 
الحق بعد ارتفاعة
 كام الف مصري 
ماتوا جوها
و براها ياما ضاعوا
 بلدى 
مش هى الحكومه
ولا كل هربان ونايم
الطيب بالضروره يبان فيها 
بالظلم ظالم  
بلدى مش 
رقصه وغنوه  
ولاد بلدى مش كسالى 
مرصوصين عالقهاوى
 كام مليون قلب صابر فيهم 
 النفس محشوره بين الضوافر 
 فيها اللى عارف ولسه قادر 
 يلم الجرح 
ويضم على الدم  
اللى نازل
 يالى فاكر الدم هاين  
كل مصرى مهوش خاين
 ولو على الديون هتعيش 
طول عمرك مداين  
والغضب لو كان مالينا 
لجل خاطرك سهم راشق  
رشقته بـتدور علينا 
بالرقاب فوق المشانق  
لو تبان الخطوه عاجزه 
راح تقوم لنا ألف 
قومه مصر 
مش هى الحكومه

مصر يمه ياحزينة


حكموا عليها تغمي عنيها 
كبير صغير 
بيلاعبها استغماية 
وهي حايرة
دايرة وسايرة 
ومين ياعيني
ينهي الحكاية 
راحت فين 
جت منين 
كله عايز يفارق 
دَوخوها و بَوخوا 
طعم الحكاية 
مصر يمه ياحزينة 
يا ام عزوة 
ويا ام عيلة 
الزمن شالك وحطك 
والشباب فـ الحوارى
نسيو رسمك 
بس لسة في المدارس 
العيال بيكتبوا يمه اسمك 
مصر يمه يا حزينة 
مركبتنا مالت بينا






معلقة سكر



معلقة سكر 
بدوبها فى بوئى
لجل من حلاوتها أسكر 
وانسى الحزن اللى بيعدى 
 ارسم ضحكة 
تمسح دمعة
من على خدى
و أشد قلمى
و أمد خطى
ألاقى صورة
قدام عيونى
لطفلة لسة
يادوب بتخطى 
معلقة سكر بخدها
فى ليلة خوف عشان
ما افكر و انسى بكرا
 اللى مش عايز يشوف