الثلاثاء، يونيو 15، 2010

حلم عبيط





ناس كتير بتحب تفسر احلامها سواء لشيخ أو للبرنامج ولكن لمدي غباء الأحلام ممكن الشيخ اللي بيفسر الحلم يتف علي واحد في السماعة يبقي عليه هو .
احلامه غريبه ممكن تكون تهيس انما مش احلام خالص ناهيك عن نوعيه احلامه وشخصياتها عصام الحضري وجاك نيكلسون اللي كانوا معاه علي قهوة عوف وغيرهم ولكن حلمه الاخير يبين مدي الهبل في الأحلم هو اصلي بيخاف يصحي في نصه حلمه  ليكون حقيقي..
و هانفترض انه كلم الشيخ مفسر الاحلام  وحكاله عن حلمي ده:

هو: الو ازيك يا شيخنا
الشيخ:اتفضل يا حبيبي
هو: انا حلمت اني ماشي في حاجة كبيرة وسودا كده وكان خدي وارم واحدة قابلتني قالتني ياه ده انت خدك وارم قوي
الشيخ:جميل يا ابني اتفضل
هو: فجأة قالتلي ده انت محتاج الشريحة دي فعلا وادتني شريحة فودافون
الشيخ:فودافون؟
هو:اه وبعدين خدي ورم اكبر فخدت بابا ورحنا للدكتور اول ما الدكتور شافني قاللي يااه ده انت مريض بالمرض العبيط..حتي سالته قولتله انا اسمع عن المرض الخبيث انما جديدة المرض العبيط ده..
وفجأة بابا اتصدم وقاللي انت مش قولتلك ميت مرة تحط أنتي فيروس للحاجات دي..قولتله انتي فيروس ايه يا بابا هو انا كمبيوتر متقول حاجة يا دكتور ..ويتدخل الدكتور بمنظار في معدتي ويقولي الحل اننا نفرمط..
نفرمط ايه يا عم ..المعدة..قاللي مين اللي اداك الشريحة دي ؟قولتله واحدة في الشارع قاللي الشريحة دي سبب المرض العبيط ..وبعد ما خرجت من العيادة قابلتني البنت وقالتلي حد ياخد شريحة من حد ميعرفوش يا عبيط ..؟
الشيخ:اقفل يا ابني ..
هو:ليه بس يا شيخنا..
الشيخ:كوباية مية والنبي يا استديو انا هاموت كده..اطفي يا عم البرنامج ده دي بلد عايزة السك..
هو:ليه كده يا شيخنا..؟
الشيخ:يا عبيط يا عبيط..

عشان كده مش هايفكر يدور على تفسير احلامه ابدا ومش هايسأل ايه معناه لكنه كان حلم غريب جدا وغبي ..لكن سألت نفسي سؤال مهم ايه علاقة الشريحة بالمرض؟قولت والله صحيح
طيب ما موس الحلاقة بيجيب فيروس كبدي مع اني كبدنا مش في خدودي تفسير برضه منطقي