الجمعة، مارس 04، 2011

مولد الفيس بوكويه

مولد الفيسبوكوية

ناس رايحة 

و ناس جاية

و شباب وبنات 

و تشات هاى باى

و عم سعيد بيمسي

على عم حزين بكاي

و الواد المعجباني 

عدى على كل فريند

خد منهم ياما ادانى 

وناس قاعدة تقزقز لب

وسياسي داخل بيسيس 

تقول أسد جبار

تشوفوا بس يشيش 

تاجر فى شادر خضار

ومعارض داخل فاتح صدره

أنا هنا يابنى ادمين

لايموها وإلا والله

اعرف ظابط فى كمين

وميمى ولولو وتوتو

عمالولنا هنا جروب

انا أسف و سامحني

ماتزعلش يا حبوب

ويا سلام على الكلامنجية

زفة لكل زيطة

شعارات من اللى هي

مزوقة كل حيطة

واخوانجى داخل بيناطح

فــ واحد متصوف

زغرلوا برم شنباته

قالوا عبارة تخوف

وأصحاب الجلالة

الجلالة الجلالة

معاهم فـ كل مقالة

مقالة مقالة

وعم المطرب ويا الشاعر 

و أنا وأنت وهما

على المقسوم

وبنات دايبة ومغرمة 

بتحلم تبقى موديل 

فـ كليب أو ألبوم

والحبيبه وكورنيش الفيس

و احلى هدايا و Relationship

والدارويش يابا ع الدارويش 

على كل وول فعل مفيش

وناس تقول يا الطيبة والاحساس 

تشوفهم ينسوا ناسهم عشان كاس

وحزانا و مجروحين 

و ناس من الحياة مالين 

فـ مولد الفيسبوكوية

ناس رايحة

و ياما
ياما
ياما لسه

ناس جاية

مين شال النقط من ع الحروف

مين شال النقط 

من ع الحروف

مين قال الكبير والصغير

اتخلق جواه عتمة وخوف

مين اوهمك 


تكون صفر عالشمال

مين قال انتهى زمن الرجال


وإن النصيب مرة يصيب 

عشرة يخيب

جايز نكون 


عايشين نزاحم بعضنا

راضين وكافيين


خيرنا شرنا

السكوت مش 


معناه ضعفنا

احنا شباب البلد 

عشقها يجرى فـ دمنا

اللي  ناسى اسم  مصر


يذاكر تاريخ كل عصر 

في حاجة غالية عندنا 


اسمها مصر

إحنا من زمان واحنا 

قوة ورمز الإخوة 

  سند ونصرة للعرب

مصر يعنى تاريخ حضارة 

مصر يعنى علوم ودين 

مصر يعنى فنون أدب

متجمعين فالمحنة 


حتى لو زاد همنا

- لسة جوانا شئ بينده

بإسم الوطن 

إسم يلم شملنا

لسة صاحى ضميرنا ما تعدم


لسة بنوحد الدعا 


ففرح كان ولا أسى

لسة جوه كل واحد فينا 

شئ جميل مابيتنسى

إسمه الوطن

لسة بنحلم بالأمنيات 


حتى لو الشوك انبدر

نعدى حدود الممكنات 


ونملا الطريق بالأمل

يعنى صوت جرس و مأذنا


عمر الكلام ماهزنا


ولا م الفتن كنا نخاف 

لسة فى حضن 

جامعنا إسمه  الوطن

اللي ناسى إسم مصر

نفكروا مين هي مصر