السبت، يونيو 26، 2010

يسألني قلبي عن تيموري










لالالالالالا دي حالة ما يتسكتش عليها أبدا 
إيه وجع القلب ده قطيعة أتاري القلب ده مابيريحش صاحبه 
 أنت أحسنلك الكتمة اللي أنا كتمهالك دي 
أحسن ما تتعبني,أنت عشان إتفرجت على فيلم تيمور وشفيقة وكام أغنية متركبة على مشاهد الفيلم تقعد تنوح لي وتتشحتف لي كده!

اعقل مش عشان اديتلك فسحة تشم نفسك عليا وتتمرع.
قلب يا قلبي أنت يا قلبي
اعقل لاعملها معاك 
أنا محبش حاجة تتعبني وإلا والله ما هفرجك غير على أفلام رعب,أنت ماصدقت ولا أيه بلا نحنحة قلوب  
قال عايز يحب قال ويتحب 
ونفسه في تيمورو 
 أنت بتصدق شغل الأفلام ده!
دي ناس بتبيع مشاعر يا عبيط 
قلبى : لا فيه -مش كل الناس وحشة -فيه حب 
_: بقولك إيه النغمة دي أناعارفاها كويس 
ربنا يهديك يا حبيبي أنت عايش معايا ليك فترة 
أنا تعبتك 
مش أنا مريحاك 
بقى بذمتك أنت تستحمل قسوة
وغدر 
وخيانة 
وهجر 
قلبى : ياستي سيبيني 
أجرب أهو يعدي عليا 
العلم بالشئ ولا السمع بي
_: شوف أنت شكلك كده مش ناوي تلايمها 
قسماً عظماً 
إن ما اتكتمت في ليلتك دي
لاعذبك بالفيلم كل شوية وأفرجك علي أفلام رومانسية
وف الأخر 
أعملك عملية بسترة
أفرجك علي اللي بيعملوه الحبيبه ف بعض اليومين دول
ياقلبي ده انت الغالي
أنا لو لقيت حد يحافظ عليك هعمل فيك كده؟
دا أنا نفسي أفرح بيك يا عبيط 
وأشوفك تحب وبتتحب أنا ليا غيرك 
قلبي : أيوه إقعدي سجديني أنتي بكلمتين دول
أنا عارف كل ما حد يعدي وابتدي اتنطط تقوليلي لا أصبر نعمل تحرياتنا,مش يمكن يطلع ويطلع زهقتيني
_: شوف بقى أنت بتفهني وحش ازاي,أنا عايزاك قلب كبير عاقل ناضج بفرجك على المآسي

اللي بتحصل ف البلدعشان تكون واعي وتديني أحاسيس جامدة نتكلم عن هم الناس والبلد وأنت طلعت قلب سيس بتدورلي ع حب وشحتفة 
قلبي : سيس سيس أنا عايز أحب أنا عايز تيموري



نياهاااااا معلش أصل الصيني مالي البلد

جاك وجع ف تيمورك 
تيمور أيه يا بتاع تيمور 
د كلهم عويسي
شوف أنا معنديش قلوب تتحكم الموضوع إنتهى فاهم 
ماتخليش العِرق الصعيدي ينئح عليا وإلااااااااااا 
قلبي : روحي يا شيخة روحي أشوف فيكي 7 شهور 
يا جاحدة يا قاسية ياللي معندكيش قلب 
_: أومال أنت أيه يا عبيط؟
قلبي : أنا الله يرحمني بقى,أنا بقيت خلاص بتفرج من بعيد لبعيد أعطف ع الغلابة أتعاطف مع قضايا 
أنا بقيت شئون طلبة
كل شوية تسمعيني مشاكل الناس وتعقديني 
وأنتِ السبب يا جاحدة يا بتاعة السياسة خللي الوطنية تنفعك بكرا أشمت فيكِ لما تتعلقي
- : أيه ده ده ده أنت بقيت حقودي وغلاوي عليا أنا يا قلبي كل شئ بأوان ولو ليك نصيب ف تيمور هتقابله 
بس خلي بالك لا مايكونش تيمور 
ويطلع أحمد حلمي في أسف على الإزعاج 
وقتها هفضحك فضيحة السمكة ف طاسة القلية