الاثنين، يونيو 10، 2013

6 أكتوبر والشهر العقاري




عايز تقضي يوم من أمتع و ألذ أيام حياتك يبقى عليك وعلى الشهر العقاري بتاع 6 اكتوبر الناس هناك مفيش كلام يوصفهم كيوت مفيش مصلحة بتمشي إلا برشوة تبدأ من 100ج لحد 350
و أنت في كافتريا الشهر العقاري اللي هي شارع للمارة بتشرب قهوتك اللي هي غالبا مسحوق من الفول السوداني المطحون وعليه شوية كاكاو و يجي يطالبك بالحساب تفاجئ بـ 5 قهوة وعصير لمون ب50 جنيه ويبدأ نقاش لذيذ حول أسعار الفور سيزون (اللي أنت قاعد فيه طبعا)
ينتهي النقاش بإعلان ميرندا تفاح الأخضر (و مشيت بأدبي)

يلفت انتباهك صوت سيدة منقبة والله لخرب بيوتكم يا ولاد الكلب هو إيه اللي 100 ج عشان أمضي ورقة ثم أجد نفسي أبتسم إبتسامة بلهاء ترتسم على وجهي إنه حقا يوم ابن كلب
وفيه شخصية محبوبة جدا هناك اسمها الدكتورة دي مندوبة الشهر العقاري لجمع الرشاوي وهي غالبا صاحبة قهوة حوالين الشهر العقاري تعال بقى ادخل المبنى 
عبارة عن علبة سردين بمنحنيات يتلاحم بداخلها قوى الشعب ستات على رجالة والله ياجماعة ماتعرفوا الستات قدام ولا الرجالة حاجة كده سمبوكسات 
وكل ربع ساعة خناقة جميلة يرتفع صوتها بـ الله يخربيوتكم انا واقف هنا من الساعة 9 الصبح ودلوقتي الساعة 3 الضهر عندنا عيال و مصالح غيركم هو مفيش حد بيساعد حد هنا ليه 
وفين وفين يا مؤمن لما شخص يغادر علبة السردين بإنتهاء مصلحته ويجدد إسلامه بذكر الشهادة 
و في تلك الممونت التي تشبه يوم الحشر يدخل عليك صاروخ أرض جو عابر للقارات 3D مجسم يتهافت عليه جميع موظفي الشهر العقاري لمساعدته للوصول الي شباك التوكيلات (شعب خدوم و متدين بطبعه)
ويستريح هذا الصاروخ على المقعد وعيون القابعين داخل علبة السردين تتفحصه جيدا
ثم تتعالى أصوات المشاجرات مرة اخرى وتسمع مكالمة هاتفية لسيدة توحي لك بإنك في فيلم بين السما والأرض (اللي كانوا محشورين في الأسانسير) وتختم مكالمتها إدعي لنا نخرج من هنا بالسلامة 
نعود للصاروخ عابر القارات دخلت علبة السردين من حوالي نصف ساعة وفوجئ الجميع بالنداء على اسمها وهنا كانت ثورة النساء المخمرات و المحجبات (احنا لينا 7 ساعات واقفين ومحدش خلص لنا مصلحة ولا اسمنا اتنادى عليه نقلع لكم الخمار والطرح ونلبس لكم بنطلونات 
و نصبغ لكم شعورنا عشان تخلصوا لنا مصالحنا) فكرت في تلك اللحظة أن أوسوس لهن بهتاف يسقط يسقط الشهر العقاري و يعتصمن لتلبية مصالحهن ولكن ابتسامة الشر همدت بداخلي وقالت لي نفسي صبرا جميلا واستمتعي بهذا اليوم الأغبر انجوي يا بنت المحظوظة أنت في مصر