فكرت أرسل رسالتي لكببر البلد لقيته ممكن مايخدش باله منها معذور برضه علية كتير ضغوط خارجية وضغوط داخلية ده حتى عمنا جمعة الشوان محدش خد باله منه في الدولة إلا ببركة الإعلام ها ياخدوا بالهم مني أنا
فكرت كتير أوجه الرسالة لمين للأمن مشغول بقلة قليلة مندسة تعبانين نفسياً
طيب أوجهها للجيش ما هو اللي تكفل برعاية البطل جمعة الشوان بس مش عيب برضه
رسيت على إني أوجه
كلامي للشعب المصري يالي في شرقها و غربها في شمالها و جنوبها يا مسلم يا مسيحي يا ظابط – يا دكتور – إعلامي – يا فواعلي- يا موظف – يا سياسي- يا مدون – يا مدرس- يا شيخ – يا مقدسه- يا كل فئات الشعب
أنــــــــــــا خــــــايــــفة
أول مرة أحس بالخوف وأنا في بلدي أه خايفة أمشي في شارع ألاقي تفجيرات و ناس بتموت و دم
خايفة أركب قطر أسافر ألاقي بدل ما يتحرق و يولع أشوف حد طلع بمسدس أو مطوة بيقتل الناس– خايفة أمشي في طريق ألاقي في ضرب بطوب ولا تكسير عربيات عشان ناس غضبانين، بقيت أقلق لما أسمع فرقعة في الشارع ، حمد الله مش بروح شرم الشيخ كتير يعنى القرش مش هايكلني – خايفة إسطوانة غاز تنفجر هي إسطونات الغاز بتنفجر ليه ، خايفة من الفجوة اللي بتحصل بين الشرطة و الشعب - على فين واخدانا 2011 هو القتل بقى سهل في البلد كده لو حظك كويس و ماتقتلتش هاتبقى مصاب ، يا مصاب بحالة كبت و قهر و وقفات إحتجاجية تتسحل فيها يا أما تكمل باقى عدد الشخصات المزدوجة في البلد و ده معناه إنك تصاب بكره البلد و توصل لحالة تخريب عامه
خفت أه خفت بعد ما مات الضمير في البلد مش عايزة أشوف مصر عراق جديد و لا يحصل فيها اللي بيحصل في السوادن زمان لما كنا محتلين كنا كلنا واحد ،مابنمَوتش حد فينا لكن دلوقتي الإحتلال جاي من فين
أفهم أيه أن قطاع عام يتخصص يعنى أيه رب أسرة يطلع معاش مبكر- يعنى أيه وظائف الحكومة أم معاش بيأمن دخل الأسرة تبقى فرص الشغل فيها قليلة و الفرص الأكثر في القطاع الخاص أبو حسن سير و سلوك أبو عقد
و يعني أيه h1n1 كانت فين وزارة الصحة
و يعني أيه عقار ميثوتريكسات لعلاج السرطان بتركيزاته المختلفة
يتسحب من الأسواق المصرية بناء على قرار الشركة المصنعة له بالخارج لوجود عيوب بتصنيع العقار يعنى نزل السوق و الناس إشترته و بعد كده أكتشف عيوبه ؟
يعنى أيه فاتورة مياة تيجي بمبلغ 17 ألف ج. م أه و النعمة 17 ألف في كام شهر لشقة عادية لا تتعدى 100م خايفين نبلغ ياخدوا الوصل و إحنا عايزين نبروزه للذكرى و الإحتفال في مناسبات الحكومة و يكون للأجيال اللي جاية تذكار
البنزين زعلهم في أيه عشان الزيادة اللي هتنزل عليه أخر شهر يناير هما مش بيتفرجوا على تونس عملت أيه عشان الغلاء طيب شعب تونس 10 مليون و إحتجم منهم 40 ألف و إحنا اللهم لا حسد 85 مليون في بطالة وسرقة و تزوير وقتل وعنوسة و غلاء و رشاوي و إرهاب زي مابتقول الحكومة عايزين يوصلونا لفييييين
أنا ماليش في السياسة بس يعنى أيه السيناريو الامريكى الصهيونى لإعادة رسم خريطة الشرق الأوسط على اسس طائفية وعرقية ويقال ان الهدف هو أن يصل عدد الدويلات الى 56
الخوف إحساس طبيعي إنما لما يتحول لظاهرة شئ مرعب الحالة أصبحت أكبر من الخوف بقت هستريا من قلق
