من هالة بركات
الناس اللي صحيوا من النوم إكتشفوا فجأة إنهم بيحبوا مبارك ,, حطوا نفسكم مكان أهل الضحايا اللي موقفش تعدادهم لحد اللحظة دي حتى بعد الخطاب اللي أثار تعاطف ناس كتير !!!! وحتى بعد كل الوعود بحمايه المتظاهرين وأمن المواطنين ,, بس الوعود الكدابة مش جديدة عليهم
لو إنتو شايفين إن في حاجة تدعو للسرور بعد الخطاب الساذج ده معلش تعالوا على نفسكم و راعوا مشاعر أهل الناس اللي ماتوا وهم بيطالبو بحقوقكم اللي إنتو فرحانين قوي دلوقتي إنكم خدتوها ,, ده لو كنتم خدتوها فعلا !! ,, متبقوش زي اللي بيزغرد في وسط الجنازة!! ومن كان يؤمن بالله و اليوم الآخر فليقل خيرا أو ليصمت
كلامه المؤثر الكاذب مش هيمحي تاريخ من الكوارث مستمر لحد النهارده .. ومش معنى إنكم مكنتوش شايفين الخراب بعنيكم قبل كده إنه مكانش موجود ,, كان موجود في كل مكان في مصر و في العشوائيات و في وسط الناس اللي بتموت سواء من جوع أو من تلوث أو من علاج قاتل أو من حوادث تكفي لتنحي الحاكم ,, بس اللي ربنا ساترها معاه و قادر يعيش حياه كريمة شايف إن اللي بيحصل اليومين دول هو الخراب ,, مع إنه لو كان عايش مع الناس اللي عايشة عيشة الكلاب أو لو كان من الناس اللي بتموت مليون مرة من القهر و الظلم كان هيعرف إن مصر خربانه قوي من زمان وأوعدكم إنها هتخرب أضعاف مضاعفة لو صدقنا التمثيلية الساذجة
رجاء .. سواء كنتم مصدقين أو مكدبين ,, سواء كنتم مؤيدين لإستمرار التظاهر أو لأ ,, فكروا شوية في الضحايا اللي كانو أبطال في نظركم من كام يوم وراعوا مشاهر أهلهم وإكتمو فرحتكم بمبارك - اللي مش فاهمة مبررها - في قلبكم لحد ما الكارثة دي تعدي على خير إن شاء الله
تعقيب بسيط :
اللى فرحان بالرئيس المخلوع بإرادتنا حد من اتنين اما مأجورين زى اللى طلعوا مظاهرات التأييد أو رجالأعمال و الطبقة الفاسدة اللى خايفين ينتهى عصر الدلع و الفلوس و ينتهى معاه حكم و سيطرة رجال الأعمال
