الأربعاء، يونيو 23، 2010

ألوان الكذب



من زمان نسمع عن ألوان الكذب والكذب ألوان الكذب الابيض تقوله على  حاجه مسموحه بيها  لأنه مش هيضر حد ومش هيئذى حد وحاجات كتير بنشوفها كذب ابيض سواء في شركات -افراد -اقتراحات- حتي ميتردش عليها غير انت اكيد بتكدب 

تقتح مثلا قائمة طعام المطعم اللي جنب بيتكم وانت اصلا مثلا في مدينة صغيرة او قرية
ساندوتش هوت دوج بيكينى أموت وأعرف إزاى هوت دوج وبيكينى أمممممممممم
ده كدب كدب يعنى
صنف "ساندويتش كوبا كابانا بالأعشاب الفرنسية "
طيب بالذمة ده كذب لونه ايه ؟؟ ده حتي مش ابيض ده اسود
يعني انا قاعد في البلد اللي بتتلخلخ تحتي دي زي ضرس وتقولي اعشاب فرنسية ؟؟
يا عم ده انت لو حطيت جرجير تبقي بتهيص علينا ..

عايز تحرجه بجد اقرالك كام نوع كده من الاعشاب الفرنسية ع الانترنت
وخش قوله ده اي نوع بقي ورصله الانواع هتلاقيه اعترف فورا...ههههههههه

النوع التاني للناس اللي بتهيص علينا مرة شوفتها عند الكوافيره كان في انتخابات للنادي اللي عندنا وهى قريبه واحد من المرشحين
قعدت تقول انا عندي شوية اقتراحات هاقولها لقريبي لتطوير النادي اسمعوا بقي الاقتراحات دي يا عم الحاج منك له وقالت لكوافير:
اولا احنا نعمل بوابة الكترونية بكرنيها ممغنطة او ممكن ببصمة الصباع اي والله ببصمة الصباع
وممكن نحط حمامين سباحة بمساحة كبيرة وقسم خاص للحريمي
واضواء كاشفة بالليزر "مش عارف ازاي" للملاعب وصالة مغطاة علي احدث مستوي في مساحة جديدة
المهم الست دى غاظتني اوي وانا خارجه قولتلها " ونحط يافطة كبيرة نقول فيها "الأرسنال او مانشيستر يونايتد "
اتضايقت وافتكرت اني بألس عليه هههههه طيب ما انا لازم أألس عليها هى بيقول اي كلام طبعا
قال بصمة صباع قال ياعم هو احنا عارفين تقعد ع النت في بلدنا دي لما هندخل نادي ببصمة الصباع ؟فوقى بقي..

واحد تاني في عيادة دكتور قعد ساعة يكلم صاحبه علي فوايد الحشيش وانه قرا علي النت انه مش زي البانجو والحاجات دي
بالعكس ده له فوايد صحية كمان حتي شكسبير كان بيضرب حشيش ودخلت معاه في المناقشة المتخلفة دي
وقولتله انا شايفه انهم يدعموه والله للغلابة او يوزعوه علي بطاقة التموين وبعدين ده له كتب كتير في فوايده اكيد
زي كتاب "السكر السنترافيش في فوايد الحشيش " لابن ابي الحشاش
ومشيت وسيبته ورحت قعدت في حتة تانية ساعات تبقي مش عايز تخش في حوار الناس اللي جنبك لكن في مصر بتضطر فعلا غصب عنك
ماهو كلام ميعقلش برضه حشيش ايه بس اللي ليه فوايد ده حشيش النحل زي عسل النحل ولا ايه يعني ؟؟ وشكسبير كان بيشرب حشيش انا سمعت الاشاعة دي فعلا
قبل كده بس طبعا ده هري كبير يعني ..

والكذب بقي اللي علي كبير زي كذب الشركات الكبيرة زي شركات الانترزفت في مصر..اعذروني هو ميتسماش غير كده عندنا مش انترنت اكيد
لانه بسرعته دي المفروض يعمله فيلم تسجيلي عنه في اوروبا ويحطوا موسيقي حزينة بجد علي وضع التكنولوجيا عندنا والسنترالات
يقولك متصدقش كلام اي حد وخلي النت لاصحابه ههههههههه صباح الكدب البنفسجي مش الابيض
ده انتوا نت كم ماشي بنظام "هو كله نت نت مافيش شتيمة " وتقولي خلي النت لاصحابه طيب سيبوه لاصحابه بقي
وطبعا الكدب الحكومي انا معرفش لونه ولسه محدش في مصر يعرف لونه لانه خليط من كل الالوان مش ابيض ولا اسود ولا قمحي لون خيرك يا مصر حتي
كدب التصريحات والوعود والانجازات والمقترحات والبرامج الانتخابية والنزاهة والشفافية والمقالات الرسمية وغيره وغيره من الوان اكتر بكتير من درجات الالوان
وزي محلات الملابس طبعا اكبر نموذج كذب "البنطلون ده تركي..يوناني..امريكي..صيني..ومش عارف ايه واي كلام وهو انتاج مصانع الفار السعيد في مخزن ام حمادة اساسا

كيف تغير العالم العربي منظور جديد







1- كنا بندور علي حاكم همام دلوقتي بندور علي "بوبي" جديدة !

2- كنا بنختار مصيرنا دلوقتي بنختار طعم شيبسي !

3- كانت الاطفال بتنام من العشا دلوقتي الاطفال بتاكل مصاصة بالكابتشينو !

4-  دلوقتي روبي قالعة بس العروسة "فلة" متحجبة !

5- كانت "باشا" بتتقال للباشا..دلوقتي بتتقال للميكانيكي !

6- كان في جمال عبد الناصر..دلوقتي في جمال مروان !

7- كانت اغنية "ماما يا حلوة يا اجمل غنوة"..دلوتي اغنية "لو سمحت يا ماما عايز كارت شحن للتليفون" !

8-كان في تعليم..دلوقتي في تعتيم !

9- كان الشعار "خلي السلاح صاحي"..دلوقتي "اتكلم ارضي يا ابن بلدي" !

10-كانت "ساعة الحظ ما تتعوضش"..دلوقتي "ساعة النت ما تتعوضش" !

11- كانت الدراويش اصحاب طرق ومذاهب..دلوقتي فريق "الاسماعيلي" !

12- كان الشيطان بيقف ويوز..دلوقتي بيقف جنب هيفاء ويهز !

13- كانت العروبة معني..دلوقتي بقت " بن " !

14- كان الشيوخ بتسبح بالسبحة..دلوقتي ع الموبايل "السبحة الديجيتال" !

15- كانت السياسة "حرفية " ..دلوقتي بقت "حرفة " !

16- كان في قيس وليلي..دلوقتي تامر وشوقية !

17- كان في "الحرملك"..دلوقتي للحاكم "الحرام لك " !

18- كانت مصر ولادة..دلوقتي زي نكتة التعلب توقع منها اي حاجة !

19- كانت البنت بتيجي برزقها..دلوقتي بتقطع رزق اللي تتجوزه وتفلسه !

20- كان في طلعت حرب..دلوقتي في "الريس عمر حرب" !

21- كان في القراءة للجميع..دلوقتي الموبايل للجميع !

22- كان "سعد زغلول"..دلوقتي "سعد..والبلح الزغلول " !..

23- كانت مصر سفينة..دلوقتي عليها ميت قرصان !

24- كان "ادخلوها امنين"..دلوقتي "احكموها فاسدين" !

25-كان الراجل "سي السيد".. دلوقتي "سيد يا سيد " !

26- كان في فن..دلوقتي في "السبكي" !

27- كان في "قمم عربية"..دلوقتي "قمامة" !

28- كان فيه "حاكم"..دلوقتي "متحكم " !

29- كانت عبارة "تاديب وتهذيب واصلاح" علي السجون..دلوقتي ممكن تتحط علي مباني الحكومة !

30- كان في تفاوت بين الباشا والفلاح..دلوقتي تفاوت بين اللي مش لاقي العيش وحامل الايبود !

31- كانت الارض بتتكلم عربي..دلوقتي بتتكلم عبري !

32- كان في مسلم ومسيحي..دلوقتي مسلم ومسيحي وبهائي ووهابي وملحد ومفكر اسلامي !

33- كنا بنغني للوحدة العربية..دلوقتي الاغاني لوحدة الاهلي والاسماعيلي !

34- كانت مصر بهية..دلوقتي بهانة !

35- كانت الاحكام عرفية..دلوقتي الجوازات هي اللي بقت كده !

36- كانت كلمة عبقري متطلعش بسهولة..دلوقتي بتتقال علي واحد يعمل جروب علي الفيس بوك بفكرة مختلفة !

37- كانت الناس لبعضيها..دلوقتي بتاكل في بعضيها !

38- كان الازهر منارة.دلوقتي شوية حجارة !

39- كان الجواز "سترة" ..دلوقتي واقي "سترة" !

40- كانت الحكومة "فعل".دلوقتي بقت "اسم" !

41- كانت "السلطنة"..دلوقتي جورج وسوف و"السطلنة" !

42- كانت الغاز يوسف شاهين..دلوقتي الغاز التصريحات الحكومية !

43- كانت ماما نجوي.دلوقتي "بسنت والدياسطي" !

44- كانت الاطفال مشتقة من "الطفولة"..دلوقتي من "التطفل" !

45- كان في "حرم جامعي"..دلوقتي "حريم جامعي" !