الثلاثاء، يونيو 14، 2011

كلمتين محشورين فـ الزور







كلمتين

محشورين فالزور

جاتلي الحالة 

لبسني الدور 

دستور ياسيادنا 

فين  الدستور

غنينا الغناوي 

الشعب قام بإنقلاب 

فالإستفتاء صوتنا 

ركبتونا الحنطور

حشيتو الجرايد 

أوكسيد إكتئاب 

الفكر ماشي حافي 

حاسس بالإغتراب

تلاتين سنة إستهبال 

 حالنا في كرب و محال

 ولما قومنا نثور

سمحوا بمرور الجمال


تعلب عجوز تمانيني

شفطني طلع عيني

جت المحكمة تحاكمه

قال عندي إرتجاف أذيني

فعز الفرحة عملنا اللالي

طلع لنا نطع مستعفي

من الكاميرا متخفي

وناس بتطفي

علينا النور


طب شروم بورم

هأو ياحالولي

طب طز فش

مخلصش الدور

شوف كام سنة

لبدين لنا فـ الدرة

ظلم

و فساد

و مسخرة

أخرتها 15 يوم

على ذمة ليمان طرة

وشوش ممسوخة الكلام

نشوفها في الإعلام

فخيوط حوارها تدوب

من الزهق قوام

كله عاش علينا الدور

بالبربشة والتهتهة

و شغل الأونطة

و التصنع بالإهتمام

هنا القاهرة

هنا القاهرة

الحالة في مصر

صعبة محتاجة قسطرة

ننادي على الحق يمد قدام

الزور يضرب كلكس و نور 

الحق يتلجلج

يرجع ستلاف خطوة ورا

طب
شروم بورم

هأو ياحالولي

طب طز فش

مخلصش الدور