الأحد، مايو 02، 2010

مفهوم القوامه من منظور شخصى







الكلام عن قوامة الرجل على المرأة أو قوامة الزوج على زوجته بس بطريقه عصريه مناسبة للعصر اللي بنعيش في.
كتير أتكلموا عنها من المفهوم الديني ولكن هنا هأتكلم عنها من مفهوم طول عمري فاهمة.
القوامة بمعنى احتواء الرجل للمرأة احتوائه ليها من كل النواحي وماعتقدش أبدا إن الراجل يكون قوام على مراته وهو مثلا اقل منها طاعة لله أو يكون اقل منها علما وثقافة طول عمري شايفة وفاهمة إن الراجل علشان يكون قوام على مرانه لازم يكون هو الأكبر سنا لانى مقتنعة تماما إن الست بتكون انضج من الراجل اللي في سنها وعقليا دماغها بتكون جايبة واحد اكبر منها بأربع خمس سنين ما بالكم بقى لو اصغر منها وخصوصا لو اصغر منها بسنييين بحس ساعتها إن فيه حاجة واقعة وحاجة شاذة في الموضوع لازم يكون هو الأكثر طاعة لله وهو اللي يشجعها على إنها تلتزم دينيا فكرة إن الست هي اللي تقول لجوزها قوم صلى أو تحثه على الصيام وصلة الرحم وكل الفروض اللي أمرنا بيها ربنا فكرة كويسة لكن بحس إنها بتبقى مزبوطة اكتر لما الراجل هو اللي يشجع مراته إنها تقوم تصلى معاه جماعة وهو اللي يشجعها إنها تصوم معاه أتنين وخميس مش تصوم لوحدها يعنى ما يروحش هو يقولها صلى وصومي وهو أساسا مابيركعهاش مايروحش هو يقولها البسي عباية وحجاب وماتحطيش برفانات وهو ينزل من بيته لابس البنتاكور والتي شيرت الكت ومغرق نفسه برفانات يعنى قبل ما يأمر مراته إنها تلتزم يكون هو أساسا ملتزم راجل من الناحية الشكلية يكون قوام على مراته يعنى ما يكونش ارفع منها بكتييير لدرجة إنها تبان جنبه إنها فيلة صغنونة ولا يكون اقصر منها وتبان جنبه إنها أخته الكبيرة راجل ما يكونش حلو وأمور لدرجة إن مراته تبان جنبه إنها دميمة اقتناعا منى ان الست لازم تكون جنب راجلها هي الأصغر وهى الأرشق وهى الأجمل وهو لازم يكون جنبها الأكبر والاطول والأتخن والأقل جمالا راجل يكون قادر على اتخاذ القرارات السليمة فى وقتها الصحيح راجل يعتمد عليه ومراته تقدر ترمى عليه حمولها راجل كريم ... لو مراته طلبت 100 جنيه علشان تشترى حاجة يديها 200 جنيه راجل مثقف قادر انه يغني مراته عن قرأة كتاب لان الاستماع لكلامه فيه متعة وإفادة ليها راجل موثوق فيه يقدر يخلى مراته تفضفض بكل اللى جواها بدون خوف راجل يمسك لسانه وقت نرفزته ومايهينش اللى قدامه بحجة انه كان متنرفز شوية راجل عارف هو عايز ايه ويكون دليل مراته وهو اللى ياخد بإيدها ويعلمها حاجات جديدة ويعرفها ناس جديدة ويشجعها على تطوير ذاتها راجل قادر انه ياخد مراته فى حضنه ولما بقول حضنه مش بقصد حضنه بتاع الدراعات وراسها المحطوطة على قفصه الصدرى انا اقصد الحضن المعنوى الحض اللى الست تحس بيه حتى ولو كان جوزها بعيد عنها مكانيا راجل يكون انضج من مراته راجل يكون هو العارف وهو الفاهم وهو الأحن هو الرحيم وقت زعله هو اللى يبتدى بمد ايد العون قبل ما مراته ماتطلب منه اى مساعدة هو اللى.... ولا بلاش احس تفتكرونى بلئح على بعضكم بالكلام وانا مش طالبة معايا وجع دماغ المهم يا بشر القوامة فى مفهومى مش ان الراجل يصرف على مراته وخلاص على كدة لان ممكن جدا تحصل ظروف صحية للراجل ومراته تضطر انها تشتغل وتصرف هى على البيت ساعتها برضه لازم الست تحس ان ليها كبير ومش معنى انها هى اللى بتصرف يبقى ده معناه ان الراجل مابقاش كبيرها القوامة عندى مش راجل يملى على مراته أوامر وعايزها تطيعه طاعة عمياء القوامة عندى ان الراجل يكون مخلص فى اتخاذ القرارات ومش بياخد قرارات وعايز مراته تنفذها لغرض ما فى نفسه علشان راحته هو وبس لأ يكون مخلص لدرجة انه بجد يقول لمراته النصيحة اللى هتفيدها حتى ولو كان تنفيذها هيجى عليه هو شخصيا راجل يكون محترم فى كل تصرفاته ولو عمل الغلط يعمل كل ما فى وسعه انه يدارى الغلط ده عن مراته علشان ماينزلش من نظرها ويفضل طول عمره قدوتها الحسنة لان خلااااااااااص لما الراجل بيصغر فى عين مراته عمره ما بيكبر تانى راجل قبل ما يسأل عن حقوقه ينفذ ما عليه من واجبات القوامة عندى مش بعلو الصوت ولا بمد الايد القوامة عندى ان الراجل يكون كبير فى كل حاجة القوامة عندى زى البطانية الناعمة الدافية الوافية اللى لو غطينا بيها البامبينو هنبقى متاكدين انه مرتاح فى نومته ومطمن ماينفعش نجيب بطانية صغنونة ماتكفيش انها تدفي البامبينو وماينفعش نجيب بطانية كبيرة تخنق البامبينو لازم تكون البطانية مناسبة للبامبينو ولو البامبينو شقى شوية وبيتحرك كتير نبقى عاملين حسابنا ان البطانية رغم شقاوته مش هتقع من عليه وانها هتفضل مغطياه وهتفضل مدياله الامان والدفا القوامة هى ان الراجل يكون راااااااااااااااااجل بجد بجد مش مفهوم الرجوله عنده إنه مشعر بس خلاص اخر الكلام كن لها علياً تكن لك فاطمة