الجمعة، أغسطس 14، 2015

#إزاي؟

هو أنت إزاي بتصدقيه
 لما بيمثل عليكي؟
بكلمة حلوة
بمراضية
عشان يبعد عنه نيتك بالآذية
جوه كل واحدة فينا 
حاسة سادسة
 بتطلع في اأخر هي اللي صادقة
بتبقى حاسة بالتمثيلية
أنت بتصدقيه؟!
 عشان المركب تمشي بيكي
ولا تمشي بيا....هاهه هيهييه.

#حبيبة_حلمي_عويضة_الرواتبي

الثلاثاء، يونيو 09، 2015


مطلوب أكتب كلمتين 
عن الوطن و الآمنين
مطلوب أكدب كدبتين 
أعشم بالرضا 
واستغل المطحونين 
باسم الدين مرة
باسم الوطن مرة
وكيف أحلي لك الحياة المرة؟
أرش لك سكر 
وﻻ نسكرهم بالمرة!!!

مدد مدد مدد مدد 
رجع الأمان يا أهل البلد 
يا مسجونين يا مقتولين 
يا مسروقين ،يا مخطوفين 
يا مصلوبين عالوتد 
قالوا الجثث زادت فالمشرحة
من بعد ليلة المدبحة
تعب الكلام
هو اللي فارق عدد اللي مات كام!!!
وﻻ اللي فارق الظلم اللي بقى عادة 
و القتل عادة 
و الموافق عالإعادة عادة
يقتلوك في العشا و عالضحى 
يشربوا في جنازتك قهوة زيادة
و افتح تحقيق و اقفله و قولوا بلطجي خارج ع النظام
و ارمي التعويذة و زن على الودان
ما أنت في الاخر يعني تسوى كام

الأحد، ديسمبر 08، 2013

ما تظلمش الدنيا




مبقاش الأخ لأخوه 
والأنانية تلاهي ما تظلمش الدنيا
دا قلِيل اللي بيرعى أبوه

كله بيمثل إنه عايش 
و الحياة 100 فل و عَشرة
و لو تدور تلقى كله زعلان 
من الـ مصانش العِشرة
ما أنت كمان ماصونتش
و هو كمان ماصنش 
اتغربنا عن بعضينا 
و احنا في مركب واحدة
بس كل واحد لوحده 
عايش مُر الوحدة
حاول تتغير قبل الزمن ما يذل
أصل الزمن له حكمة
و كاس داير على الكل

الأحد، سبتمبر 08، 2013

هو فيه ايه


- زمان كنا ننام بليل ونصحى الصبح دلوقتي ليلنا نهار و نهارنا ليل منه لله عمرو دياب من 9 سنين بشرنا بليلي نهاري.

- زمان كنا بنتونس باللمة دلوقتي بنتونس بمواقع التواصل الإجتماعي.

- زمان كنا بنضحك في وش بعض أكتر من دلوقتي بقينا بنضحك في وش الموبايلات و اللابات أكتر مابنضحك في وش أهالينا و أصحابنا و بندعي بطولة العمر للبطارية.

- زمان مكناش بنآمن للغريب و نآمن للقريب دلوقتي لا الغريب ولا القريب يتآمنوا.

- زمان كنا لما نحب نكتب حاجة بنكتبها بالقلم و الورق مالي البيت و قبل ما نكتبها أو بعد نقعد نشخبط في الورقة دلوقتي فيه ناس لما تدور على قلم في البيت و المعجزة تحصل و تلاقيه تصلي ركعتين شكر لله .

- زمان كان الملح بيملح و السكر بيحلي من أول رشة و معلقة .

- زمان كان التلفزيون المصري مصدر موثوق طلع ضاحك علينا من صغرنا و فاكرين بيعرض مسرحية العيال كبرت ومدرسة المشاغبين كاملة أتاريه بيعرض ربعها بس واتفرجنا على تلات تربعها اللي مشفنهوش على الفضائيات.

- زمان كان الخيارات المتاحة عندك لمشاهدة مسلسل في التليفزيون 
يا مسلسل أحمد عبد العزيز التاريخي يا مسلسل أحمد عبد العزيز الرومانسي 
يا مسلسل أحمد عبد العزيز الصعيدي. جُطع مهند على كريم 

- زمان كان على الحجار بيطلع على نفس القناة مرة العصر بـ تيشرت و شورت ونضارة شمس بيغني (يا اسكندرية يا مدوبانى) ومرة الفجر بالجلباب والجبة و بيغني (صلينا الفجر فين) 
دلوقتي ممكن تشيل في نفسيتك لو لقيت حد من أصحابك أو اخواتك عامل نغمة الموبايل تسلم الآيادي و تستغفر ربنا لو قفشت نفسك بتدندنها من غير ماتشعر من كتر ما زهقت منها على الفضائيات.

- زمان كان ممكن تشرب 200 قزازة كوكاكولا عشان تلاقي الغطا اللي عليه الجادون 
دلوقتي ممكن تعمل ثورتين وتتظاهر و تتسحل و تخلع رئيس و تعزل التاني و يطلع تلاتة عين اهلك عشان تلاقي دستور عليه القيمة .

- زمان قبل التوك شوز كان عندك برامج متنوعة و مفيدة بانوراما فرنسية و تاكسي السهرة و اخترلنا لك و تستنى فقرة الساحر ديفيد كوبر فيلد عشان تشوف خدعة جديدة ازاي بينسخ بصمة حد تاني من على كوب زجاج ببودرة الرصاص و الشمع 
دلوقتي بقى عندنا توك شوز بمقدمين برامج نفس البصمة و نفس ايدلوجية الزمبلك و نفس الكلام بس الوشوش مختلفة وطريقة الكلام حسب كل فئة في المجتمع و الغاوى ينقط بطاقيته.

- زمان في سن المراهقة أو قبلها كنت تتفرج على أفلام الأبيض و الأسود عماد حمدي و شادية وهما بيحبوا بعض و فجأة تلاقي البرق بيبرق و الرعد بيرعد و الشبابيك تخبط ف بعض وماتشوفش حاجة بوتاااااااااتن و المشهد التاني لازم تتكوزني أنا حامل و يقول لها بس أنا مسافر و طبعا عشان كنا عيال أفكارنا بريئة مكنتش دماغنا تجيب و لا تودي في اللي حصل  بس العقل الباطن ما يعلم بي إلا ربنا 
دلوقتي الجيل الجديد بيرقص على هاتي بوسة يا بت هاتي حتة يابت و بيقول لي هاتي بوسة يا مصيبتي يادي الحوسة ادي له ولا ايه, مش محتاج عقلك الباطن في حاجة خالص كله على عينك يا تاجر.

هو أنا بتكلم عن زمان ليه ؟ أصل من و أنا صغيرة في خامسة إبتدائي بنربي قطط تخيل يا مؤمن ربينا على قد ما ربينا كانت القطط كلها بتقول مياااااو دلوقتي اكتشفت القط الشيرازي اللي ماما مربياه في شقة سوهاج لما بينونو بيقول بوووووووووووي آه والله زمبؤلك كده

الاثنين، يونيو 10، 2013

6 أكتوبر والشهر العقاري




عايز تقضي يوم من أمتع و ألذ أيام حياتك يبقى عليك وعلى الشهر العقاري بتاع 6 اكتوبر الناس هناك مفيش كلام يوصفهم كيوت مفيش مصلحة بتمشي إلا برشوة تبدأ من 100ج لحد 350
و أنت في كافتريا الشهر العقاري اللي هي شارع للمارة بتشرب قهوتك اللي هي غالبا مسحوق من الفول السوداني المطحون وعليه شوية كاكاو و يجي يطالبك بالحساب تفاجئ بـ 5 قهوة وعصير لمون ب50 جنيه ويبدأ نقاش لذيذ حول أسعار الفور سيزون (اللي أنت قاعد فيه طبعا)
ينتهي النقاش بإعلان ميرندا تفاح الأخضر (و مشيت بأدبي)

يلفت انتباهك صوت سيدة منقبة والله لخرب بيوتكم يا ولاد الكلب هو إيه اللي 100 ج عشان أمضي ورقة ثم أجد نفسي أبتسم إبتسامة بلهاء ترتسم على وجهي إنه حقا يوم ابن كلب
وفيه شخصية محبوبة جدا هناك اسمها الدكتورة دي مندوبة الشهر العقاري لجمع الرشاوي وهي غالبا صاحبة قهوة حوالين الشهر العقاري تعال بقى ادخل المبنى 
عبارة عن علبة سردين بمنحنيات يتلاحم بداخلها قوى الشعب ستات على رجالة والله ياجماعة ماتعرفوا الستات قدام ولا الرجالة حاجة كده سمبوكسات 
وكل ربع ساعة خناقة جميلة يرتفع صوتها بـ الله يخربيوتكم انا واقف هنا من الساعة 9 الصبح ودلوقتي الساعة 3 الضهر عندنا عيال و مصالح غيركم هو مفيش حد بيساعد حد هنا ليه 
وفين وفين يا مؤمن لما شخص يغادر علبة السردين بإنتهاء مصلحته ويجدد إسلامه بذكر الشهادة 
و في تلك الممونت التي تشبه يوم الحشر يدخل عليك صاروخ أرض جو عابر للقارات 3D مجسم يتهافت عليه جميع موظفي الشهر العقاري لمساعدته للوصول الي شباك التوكيلات (شعب خدوم و متدين بطبعه)
ويستريح هذا الصاروخ على المقعد وعيون القابعين داخل علبة السردين تتفحصه جيدا
ثم تتعالى أصوات المشاجرات مرة اخرى وتسمع مكالمة هاتفية لسيدة توحي لك بإنك في فيلم بين السما والأرض (اللي كانوا محشورين في الأسانسير) وتختم مكالمتها إدعي لنا نخرج من هنا بالسلامة 
نعود للصاروخ عابر القارات دخلت علبة السردين من حوالي نصف ساعة وفوجئ الجميع بالنداء على اسمها وهنا كانت ثورة النساء المخمرات و المحجبات (احنا لينا 7 ساعات واقفين ومحدش خلص لنا مصلحة ولا اسمنا اتنادى عليه نقلع لكم الخمار والطرح ونلبس لكم بنطلونات 
و نصبغ لكم شعورنا عشان تخلصوا لنا مصالحنا) فكرت في تلك اللحظة أن أوسوس لهن بهتاف يسقط يسقط الشهر العقاري و يعتصمن لتلبية مصالحهن ولكن ابتسامة الشر همدت بداخلي وقالت لي نفسي صبرا جميلا واستمتعي بهذا اليوم الأغبر انجوي يا بنت المحظوظة أنت في مصر

الخميس، يونيو 06، 2013

نزلت دمعتي




نزلت دمعتي 
على نزلة دمعته
أنا حاسس بيك يا صاحبي
لما حد يوحشك 

و مدفون فـ تربته
اصل الموت دا بيسرق اعز ناس لينا
و يسيبنا في فرقة صعبة
الشوق فيها كاوينا
تشتاق لحضنه ليك
تمد ايدك لي
صوته يرن في ودنك
عينك تدور عليه
تلاقي السراب حواليك
تصرخ روحك منك
محتاجك مش لاقيك
وتنزل على الخد تفوت 
دمعة ملهاش صوت
لا حد بِها حس 
ولا في يوم كان لِهاحس
و بكف ايدك تمسح أشواقك حزينة
بنطبطب ونطيب على روحنا بإيدينا
وأهي الأيام بتفوت