أول إختبار (أنا و مصر) ليلة الإستفتاء على التعديلات الدستورية 19مارس 2011
من حق البلد دي عليا إني مخفش و وكلت أمر مصر لربنا
ومش هسمح بأي ضغوط نفسية أو عاطفية تأثر على رأيئ
الجيش من بداية التنحي وفي لقاء قال إنه هايقعد سنة ومش معني قولة نعم إنه هيمشي
البلد دي محتاجة تظبيط لفكر الناس الأول
الدستور مش هو الأزمة
الأزمة الحقيقة إكتشاف نفوس وأطماع ناس كتير
عشان مصلحتهم متسترة تحت مسميات أكتر
الثورة دي ماقمتش عشان نخاف
بالعكس عشان نقتل الخوف اللي بداخلنا
والناس اللي ماتت و إتعذبت وشفتهم وبكيت بالدموع
هيخليني أخاف بس على حاجة واحدة
إني لازم أقول الحق
بعيد عن الضغوط
احنا في حالة حرب نفسية لا أكثر
واللي منتمي لقضية عارف كويس أبعادها الحقيقية و أولها من أخرها
مشكلتنا من أيام نظام مبارك بث روح الرعب عشان نتكتم ومنفهمش ومنطالبش بالحق
اللي أعرفه إن في أي مكان بتقوم في ثورة بيتعمل دستور جديد
وتنعقد لجنة لدراسة و وضع مواد الدستور
و مصر مش عاقر و لا ناقصها أساتذة قانون
كل اللي محتاجة له مصر ناس بتراعي ربنا و عندهم ضميرهم
كمان بتواجهنا مشكلة فقدان الثقة في كل شئ و السماح للأخرين بتقبل اللعب على الوتر دا و الإستماع له عشان نصدق المخاوف و الشكوك
خلاصة الكلام أنا منتمية لقضية و مش هتخلى عنها و ان شاء الله هروح بكرة و هقول لأ للتعديلات الدستورية و أخر حاجة هختم بيها :
اللهم إني وكلت أمر مصر إليك فأحفظها إنك خير حافظ , أودعتها أمانة لديك ف تكفلها برعايتك , اللهم خِر لنا وأختر لنا , و أصلح لنا أمرنا اللهم اجعل هذا البلد امنا ,اللهم إحمي مصر من الفتن ما ظهر منها و ما بطن
