الاثنين، أغسطس 16، 2010

كلم مصر



كلم مصر
جسمي إنتفض
ترعد
والنبض زاد
نبض
لما بل الحزن ريجى
لجتنى بتعصب 
من ضيجى
جرى اللسان بالعادة
يشتكي ويلعن
أبو الهم فيكى
شايفك مغصوبة
وأناالمجبور
الفكر متكسح
و الفعل مكسور
لاعدنا بنفرح 
ولا بنربح
و اللي واجع جلبى
حالنا اللى بيجرح
الجريب والغريب
عاينهش فيكى
ويعض
كلم مصر
عندي ليكي
ألف كلمة
وكل كلمة شايلة
من عمري سنين
الحب والمودة إتبدروا
ليك من الحنين
عمر جلبك ماكان جاسى
فين حنينك على ولادك
اللي عم يرعوا في أرضك
فين 

كلم مصر
عمر الكلام ما كان
له سقف ولا حطيان
ولاسند ولا بيبان
بس الحزن 
شد الرحاية
على قلبى 
وعصر 
فى عصر
كلم مصر 

حلمت بيكى
وفالحقيقه 
عايش كابوس
على توبي عف 
ولزج السوس
خايلونى
وشبكوني
فهمومي
وخلوني
ع المبادئ أدوس
كلم مصر
لاجل اللقمة خلونى
عايش مسكور
أوطى على الإيدين
وأبوس
ملكونى الخوف
وعزفت على 
أوتار الكسوف

كلم مصر
جولت نمرتها كام
أصل الغشم عمي العلام
وسيدى البهلوان
عايلعب مع الحاوى
وإحنا ف العتمة
بنتوضا من الميضا
وبندعى يكون
له لزمة الكلام

كلم مصر
فى اللي زعلان منك
وزعلان عليكى
بننده بعلو 
الصوت بنحبك
إمتى بس تحسي بينا
هما اللى خانو اناماخنت
كنت لسه او ماكنت
العيال السمر هما
اللى هيرسوا بالسفينة
بلاد الدنيا لو جاعت
انت يايُمه اللى توكليهم
ولو ولادك فالتوهه تاهت
إنتى يَمه هاترسي
ف يوم بيهم

كلم مصر
جرجس وجابر
تعبوا من الأسية
عايفتنوا بينهم 
عشا وضحيه
غرقوهم وماهمهمش
صانوا المحبة 
ومخافوش
وشافوا بعيونهم
كتير وشوش
مايساوش
و لسه القلوب
مسلمة بالأمان
وحبك فى الجلب
ماهوش مغشوش

كلم مصر 

لبسوني ألف تهمة
والمتهم ابن باشا
واقف عليا سجان
بيمرجح قدامي
بدلة الاعدام
نديت بعلو صوتى
يا بشر
صوتى إنجرح
قلبي إنفطر
رد صوت الحال 
وقال
مسكين يا فقير
لا أهتم حد بوجودك
ولا حد بيك حس

كلم مصر
لميت معايا كل الحروف
شفت الظالم والجاني
والمجني عليه والمظلوم
لقيت إن احنا 
اللى بنسيئ ليكى
باسم الظروف

كلم مصر
كان حلم عمري 
أكون عروسة
وياما حلمت أنا 
ببدلة عريس
بس الحكاية دبلت الحلم
وصبح كابوس
متعلق ف أحمال الفلوس
ومنين أجيبك يا قرش
والحال منحوس

كلم مصر
بابا سألني
لما أكبر
عايز أطلع أيه
من غير ما أفكر
قلت عايز أبقى بيه
أخد من البنوك و أطير
وبعد شوية أرجع
مسئول كبير
و أتكلم باسم بمصر

كلم مصر
مالها مصر
عايشين فى خيرها
ومن خير نعيش
انسوا الكلام
عن الحضارة 
والتاريخ
وبلاش تنطيع
هى سياسة واحدة
وغيرها مفيش
عاش
عاش 
عاش 
التطبيع

كلم مصر
بكتاب الله وسنته
سنصون الارض 
ونحفظها
ستكون الكلمة لنا
إخوانى
سندق أعناق الفساد 
فى الأرض
طال العمر ام قصر

كلم مصر
سمعانى 
صوتى واصلك
إنت إزاى صابرة
ومستحملانا
د أنا يدوب بقرشين حشيش 
بعرف أشوف
أنا لو منك أفوت البلد
اصل اللى فوق مني
مابيختشوش