الأحد، ديسمبر 08، 2013
الأحد، سبتمبر 08، 2013
هو فيه ايه
- زمان كنا ننام بليل ونصحى الصبح دلوقتي ليلنا نهار و نهارنا ليل منه لله عمرو دياب من 9 سنين بشرنا بليلي نهاري.
- زمان كنا بنتونس باللمة دلوقتي بنتونس بمواقع التواصل الإجتماعي.
- زمان كنا بنضحك في وش بعض أكتر من دلوقتي بقينا بنضحك في وش الموبايلات و اللابات أكتر مابنضحك في وش أهالينا و أصحابنا و بندعي بطولة العمر للبطارية.
- زمان مكناش بنآمن للغريب و نآمن للقريب دلوقتي لا الغريب ولا القريب يتآمنوا.
- زمان كنا لما نحب نكتب حاجة بنكتبها بالقلم و الورق مالي البيت و قبل ما نكتبها أو بعد نقعد نشخبط في الورقة دلوقتي فيه ناس لما تدور على قلم في البيت و المعجزة تحصل و تلاقيه تصلي ركعتين شكر لله .
- زمان كان الملح بيملح و السكر بيحلي من أول رشة و معلقة .
- زمان كان التلفزيون المصري مصدر موثوق طلع ضاحك علينا من صغرنا و فاكرين بيعرض مسرحية العيال كبرت ومدرسة المشاغبين كاملة أتاريه بيعرض ربعها بس واتفرجنا على تلات تربعها اللي مشفنهوش على الفضائيات.
- زمان كان الخيارات المتاحة عندك لمشاهدة مسلسل في التليفزيون
يا مسلسل أحمد عبد العزيز التاريخي يا مسلسل أحمد عبد العزيز الرومانسي
يا مسلسل أحمد عبد العزيز الصعيدي. جُطع مهند على كريم
- زمان كان على الحجار بيطلع على نفس القناة مرة العصر بـ تيشرت و شورت ونضارة شمس بيغني (يا اسكندرية يا مدوبانى) ومرة الفجر بالجلباب والجبة و بيغني (صلينا الفجر فين)
دلوقتي ممكن تشيل في نفسيتك لو لقيت حد من أصحابك أو اخواتك عامل نغمة الموبايل تسلم الآيادي و تستغفر ربنا لو قفشت نفسك بتدندنها من غير ماتشعر من كتر ما زهقت منها على الفضائيات.
- زمان كان ممكن تشرب 200 قزازة كوكاكولا عشان تلاقي الغطا اللي عليه الجادون
دلوقتي ممكن تعمل ثورتين وتتظاهر و تتسحل و تخلع رئيس و تعزل التاني و يطلع تلاتة عين اهلك عشان تلاقي دستور عليه القيمة .
- زمان قبل التوك شوز كان عندك برامج متنوعة و مفيدة بانوراما فرنسية و تاكسي السهرة و اخترلنا لك و تستنى فقرة الساحر ديفيد كوبر فيلد عشان تشوف خدعة جديدة ازاي بينسخ بصمة حد تاني من على كوب زجاج ببودرة الرصاص و الشمع
دلوقتي بقى عندنا توك شوز بمقدمين برامج نفس البصمة و نفس ايدلوجية الزمبلك و نفس الكلام بس الوشوش مختلفة وطريقة الكلام حسب كل فئة في المجتمع و الغاوى ينقط بطاقيته.
- زمان في سن المراهقة أو قبلها كنت تتفرج على أفلام الأبيض و الأسود عماد حمدي و شادية وهما بيحبوا بعض و فجأة تلاقي البرق بيبرق و الرعد بيرعد و الشبابيك تخبط ف بعض وماتشوفش حاجة بوتاااااااااتن و المشهد التاني لازم تتكوزني أنا حامل و يقول لها بس أنا مسافر و طبعا عشان كنا عيال أفكارنا بريئة مكنتش دماغنا تجيب و لا تودي في اللي حصل بس العقل الباطن ما يعلم بي إلا ربنا
دلوقتي الجيل الجديد بيرقص على هاتي بوسة يا بت هاتي حتة يابت و بيقول لي هاتي بوسة يا مصيبتي يادي الحوسة ادي له ولا ايه, مش محتاج عقلك الباطن في حاجة خالص كله على عينك يا تاجر.
هو أنا بتكلم عن زمان ليه ؟ أصل من و أنا صغيرة في خامسة إبتدائي بنربي قطط تخيل يا مؤمن ربينا على قد ما ربينا كانت القطط كلها بتقول مياااااو دلوقتي اكتشفت القط الشيرازي اللي ماما مربياه في شقة سوهاج لما بينونو بيقول بوووووووووووي آه والله زمبؤلك كده
الاثنين، يونيو 10، 2013
الخميس، يونيو 06، 2013
الجمعة، فبراير 22، 2013
شُفت
شُفت إختلاط الأمل بالكآبة
وصبر العفاف فـ صدور الغلابة
شُفت إختطاف الضعاف بالديابة
فهجرت القراية و فُت الكتابة
.........
شُفت الحجاب اللي شف الجسد
شُفت احتجاب العقول بالحسد
شفت الكلاب لما تعوي عالأسد
فداعيت بالهداية وقريت سورة المسد
..........
طب شُفت التصنع وكبت الغرام
طب شُفت التمنع و رفض الحرام
طب شُفت احترام الصبايا العوام
كام واحد رفض اشتهاه لفك الحزام
.......
طب شُفت العفيف فالظروف الغلط
طب دُقت الرغيف اللي محشي بزلط
طب عرفت الشريف اللي لم النقط
ف وقت الغواية و عز العبط
.......
ارتجالنالك بشعر الخطيئة
ارتحالنالك طريق الحقيقة
اشتغلنالك بمليون طريقة
شُفت البراءة اللي باقية فملامحي
و اللي باعوا الصداقة فعيشي وملحي
وعشان مفيش اي معنى لنهايتي
قفلت الرواية وحنيت لجرحي
فهمت الحكاية طفيِت الحريقة
أنا النعمة و أنا اللعنة
أنا النعمة و أنا اللعنة
أنا اللي بشوف ببصيرة الروح
في الضلمة كما الأعمى
أنا الضحكة و أنا الدمعة
أنا الساحر و أنا الساخر
أنا الإحساس فكل كلمة لها معنى
أنا العقرب و أنا التعلب
و أنا ضمة حنان تغلب
أشد بركان فيه قسوة
انا الغلبان أنا اللى تشوفه من برة
تقول فرحان و أنا التعبان من الأزمة
أنا الصابر و أنا الكاتم
صراخه من وجع العلة
و أنا الشاهد على الفعلة
أنا المواطن سلعة في سوق الحكام
بيبعوا ويشتروا بدين اللي جابوه
أنا طين الأرض المتعاص دم
أنا اللي شايل فيكِ الهم
أنا اللي هطلع لهم في يوم
كما المارد من القمم على غفلة
الاشتراك في:
الرسائل (Atom)