الحياة دلوقتي عبارة عن لعبة
يا تعرف تلعبها صح
يا تلاقى فى الأخر شاشه كبيره تطلع تقولك
game over يا فاشل
ترجع من تانى تلعب نفس اللعبة وتلعبها على الناس
فى ناس بتتلعب صح معاهم لإنهم غاويين مغامرة
فى ناس بتلاقيهم لعيبة ومبدأهم
مبروم على مبروم ما يرولش يا مان
يا نلعب فريق واحد يا (( ماتبعش الميه في حارة السقايين ))
بس اللعبة الكبيرة اللى مش بتخلص
التحوير
برغم إنها لعبة قديمة ومكشوفة بس بتتنسي
كل فترة حد يطلع يحور أفراد - إعلام - حكومة
و بيجى علينا وقت نزهق من الألعاب اللى بتدور حوالينا
أحيانا بنلاقى الحياة مالهاش طعم زى الميه
لا لون ولا طعم بس مانقدرش نستغنى عنها
اللعبة بتدي روح للحياة
بس لما كترت الألعاب طعمها بقي بايخ
و ضاع مننا حاجات كتير قوي
إحنا ممكن نشترى الأكل بس منعرفش نشتري النفس اللى تشتهي
وتستمر اللعبة و تفضل الناس زى ما هي تخلص لعبة تدخل الناس فى دايرة لعب تانية
1- لعـبة التوريث
2-لعـــبة المرشحين الشعبيين لرئاسة الجمهورية
3- لعـبة التـــغـيـر
4- لعبة الفتن الطائفية
5- لعـــبة الفساد
6- لعـــبة الغلاء
وهانفضل كده لحد ما ملامحنا تروح من وشوشنا
مش هالبس عمة و لا هعمل فيها شيخ
أخر كلمة هقولها :
طعم الحياة راح و الزهق والملل خدها تمليك ياريت خدها إيجار جديد
من كتر اللعب ماكتر حوالينا
