اعمل عبيط وفوت
أسمع و اتمزج
مش عيب
لكل لعيب وحويط
بيرص بكيف الأكاذيب
و اما تقابل حد بيسرق
خد من قوتنا
شقانا
عرقنا
كدب عينك
متصدقش
دا فاعل خير
و اما يقولوا بطالة مفيش
ابصم بالعشرة وعيش
ويا شباب عالقهوة يشيش
و سالف تمن بقشيش
اعمل عبيط
خليك فالصورة
زاحم وانحشر
خليك غتيت.
مش فاهم حاجة من الصورة
فيها ايه لما فـ الظيطة تظيط
اعمل عبيط عمر البكا
ماغير التخطيط
اعمل عبيط مهما تكون
فيها غريب مطحون
ماشي تحت ألف حيط
اعمل عبيط
و اقف من بعيد
اتبسط ويا المباسيط
اعمل عبيط
لما تشوف الناس متحسرة و متحاصرة
وطالعين بكام قتيل من قلب المظاهرة
اعمل عبيط
على أي تعديل
شالو وزير
جابو وزير
والحالة عجب
ماتفلقش راسك
بالتفكير
يا بلد و ماشية بضهرها
يا كل حاجة و عكسها
ماتسيتغربش ليه الناس
ماشية بالعكس
بترشى
بتمشي مخالف
ومابتخفش
كلة بيعدي بالقرش
اعمل عبيط وعيش
تشوف بلدنا جنة
وهي جنة أيوه جنة
هي جنة للعبيط
